“زرداری، شریف مافیا ملک کو گھٹنوں پر لے آیا”

اسلام آباد: چیئرمین پی ٹی آئی عمران خان کا کہنا ہے کہ مافیا تیس سال سے ملک تباہ کررہا ہے،ہم سری لنکا جیسی موومنٹ سے دورنہیں جب لوگ سڑکوں پر نکل آئینگے۔

تفصیلات کے مطابق سماجی رابطے کی ویب سائٹ ٹوئٹر پر جاری بیان میں عمران خان نے سیاسی مخالفین کو آڑے ہاتھوں لیا اور کہا کہ صرف تین ماہ میں زرداری،شریف مافیا ملک کو سیاسی ومعاشی طورپرگھٹنوں پرلےآیا۔

انہوں نے کہا کہ یہ مافیا تیس سال سےاپنی لوٹی ہوئی دولت بچانےکیلئےملک کو تباہ کررہاہے، سوال یہ ہےکہ کب تک ریاستی ادارے اس بات کی اجازت دیتےرہیں گے؟۔

عمران خان نے اپنی ٹوئٹ میں کہا کہ پاکستانی عوام اس مافیا کو مزید لوٹ مار کی اجازت نہیں دینگے، عوام کا حقیقی آزادی کی کال پر ردعمل شانداررہا، ہم سری لنکا جیسی موومنٹ سے دور نہیں جب لوگ سڑکوں پر نکل آئینگے۔

گذشتہ روز پنجاب اسمبلی کی صورت حال کے بعد عوام سے ویڈیو لنک خطاب میں چیئرمین پی ٹی آئی عمران خان کا کہنا تھا کہ جو کچھ پنجاب اسمبلی میں ہوا، اس پر حیران ہوں اب سب کی نظریں سپریم کورٹ کی طرف ہیں۔

عمران خان نے کہا کہ میری ہمیشہ دعا رہی کہ ہماری جمہوریت مضبوط ہو، جمہوریت کی ایک بنیاد اخلاقیات ہوتی ہے لیکن سب نے تماشا دیکھا کہ سیاست دانوں کی قیمتیں لگ رہی تھیں۔

چیئرمین پی ٹی آئی کا کہنا تھا کہ ڈپٹی اسپیکر پنجاب اسمبلی سمجھ نہیں آتی کس قسم کا انسان ہے ؟ اس سے قبل بطور پارٹی سربراہ میرے خط کو تو پارلیمنٹ میں مسترد کردیا گیا تھا اس ڈپٹی اسپیکر نے تو پرویزالٰہی کا ووٹ بھی حمزہ کے کھاتے میں ڈال دیا۔